Grumbeere reffe is immer wierer watt scheenes, ebbes for Jung unn Alt. Ebbes wa diesmol awer anerschder, mer harre ebbes meh Krout im Grumbeerestick. Ach, watt saan äich, itt wa noch meh als ebbes wie sunst. Dobäi harre die Rentner schunn vorher enn paar große Hoppehääf gerobbt. Mer kinnt grad mäne, do hätt äner extra ebbes ninngesät, also Krout- unn Rapssoome. Ebbes is sicher, käner wääs ebbes genaues nitt.
Bäim Ousfahre hott dä wo uffem Bulldogg gesess hot, die Fohre ball nitt gesiehn vor louder Krout. Er hott schunn ebbes besser uffbasse miese als vorisch Johr. 
Awer sunst war alles gut, ebbes kerzer die Räie, mer wa ebbes frieher am Enn, ebbes meh Läit als sunst unn enn Haaf Kinner. Itt ware so viel Hänn do, die wo gewuselt honn, do kunnt äich mäich noch so aanstrenge. Kaum honn äich noh äner Grumbeer gräife wulle, do wa dä wo näwer mer geroff hott, ebbes schneller als äich. Mer ware so flott, datt die wo mit der Grumbeereousmachmaschin gefah sinn, nitt nohkame. Datt miest bäim nächste Mool ebbes schneller gehn. Noh annerhaleb Stunn ware se all im Sack und schnell gewoo.
25 Zentner harre mer geroff, ach watt sahn äich, sogar 1250 Kilo warent. Unn watt ware die Grumbeere so scheen, ebbes dicker, ebbes wenischer kläne. Unn schmagge duun se aach, mer honn schunn ebbes Flibbes devunn gemach.
Kaffie unn Kuche, Brotworscht und Stubbi, Limo for die Kinner, itt wa for all ebbes debäi. Am beste honn dann die kläne gequellte Grumbeere ousem Kessel geschmackt unn die dann mit Salz unn gut Butter gess. So ebbes gures girret nore bäim Grumbeere reffe.
Drum freue mer us ebbes meh uff nächst Johr ...